കേരളം, ചേര കാലഘട്ടം, പതിനൊന്നാം നൂറ്റാണ്ട്

ശ്രീരാമ വെങ്കല പ്രതിമ

Bonhams Hongkong 

കേരളം, ചേര കാലഘട്ടം, പതിനൊന്നാം നൂറ്റാണ്ട്

കേരളീയ ശൈലിയുടെ ഉയർന്ന അലങ്കാരവും പ്രകടമായ ചൈതന്യവുമുള്ള ഈ വെങ്കല പ്രതിമ ഇന്ത്യയുടെ മഹത്തായ ഇതിഹാസത്തിലെ നായകനായ ശ്രീ രാമന്റെ അപൂർവ ശിൽപ ചിത്രീകരണമാണ്. ഹോങ്കോങ്ങിലെ ബോൻഹംസ് മ്യൂസിയത്തിൽ വില്പനയ്ക്കും പ്രദർശനത്തിനുമായി വച്ചിരിക്കുന്നു. 

ഇന്ത്യൻ കലയുടെ ഏറ്റവും വിലമതിക്കാനാവാത്തതും പഠിക്കപ്പെടാത്തതുമായ ഒരേടാണ്  കേരളത്തിലെ വെങ്കലശില്പങ്ങളും ശില്പികളും.

"കേരളത്തിലെ അജ്ഞാതരായ വിശ്വകർമ കലാകാരന്മാരെപ്പോലെ ലോകത്തിൽ എവിടെയും വെങ്കല ശില്പങ്ങളുടെ അലങ്കാര ഘടകങ്ങൾക്ക് ഇത്രയധികം ഊർജവും ശ്രദ്ധയും ആരും നൽകിയിട്ടില്ല" എന്ന് Dr. Pal ഊന്നിപ്പറയുന്നു. (ibid., p.119) 9-ആം നൂറ്റാണ്ടിൽ അവസാനിച്ച പല്ലവ രാജവംശത്തിന്റെ രാഷ്ട്രീയ ആധിപത്യത്തിന് കീഴിലാണ് വെങ്കല ശിൽപം (മരത്തിന് വിപരീതമായി) നിർമിക്കാൻ കേരളത്തിൽ ആരംഭിച്ചതെന്ന് അദ്ദേഹം പറയുന്നു. കൂടാതെ, ആഡംബരവും ഉജ്ജ്വലവുമായ ഈ അലങ്കാര നിർമ്മാണ രീതി 12-14 നൂറ്റാണ്ടുകളിലെ ഹൊയ്‌സാല ശൈലിയിൽ നിന്നുള്ള കലാപരമായ കടമെടുപ്പിനെ സൂചിപ്പിക്കുന്നു.

ചരിത്രം 

കേരളത്തിലെ വെങ്കല നഗരമായ മാന്നാർ ആലപ്പുഴ ജില്ലയിലെ ചെങ്ങന്നൂർ താലൂക്കിലാണ് സ്ഥിതി ചെയ്യുന്നത്. പമ്പ, മണിമല, അച്ചൻ കോവിൽ എന്നീ മൂന്ന് നദികളുടെ സംഗമസ്ഥാനത്താണ് ഇത് സ്ഥിതി ചെയ്യുന്നത്. ഉത്തർപ്രദേശിലെ മൊറാദാബാദ് നഗരത്തിന് തൊട്ടുപിന്നാലെ ഇന്ത്യയിലെ ലോഹ ഉൽപന്നങ്ങളുടെ രണ്ടാമത്തെ വലിയ നിർമാണ സ്ഥലമായി മാന്നാർ കണക്കാക്കപ്പെടുന്നു.

ഏകദേശം 200 വർഷം മുമ്പ്, തിരുവിതാംകൂർ ഭരണാധികാരികൾ തിരുവിതാംകൂർ ക്ഷേത്രങ്ങളിൽ ആചാരാനുഷ്ഠാനങ്ങൾക്കായി ഉപയോഗിക്കുന്ന വെങ്കല ചിഹ്നങ്ങൾ പതിപ്പിക്കുന്നതിനായി വിശ്വകർമ സമുദായത്തെ തമിഴ്‌നാട്ടിലെ ശങ്കരൻകോവിൽ, തഞ്ചാവൂർ പ്രദേശങ്ങളിൽ നിന്ന് മാന്നാറിലേക്ക് കൊണ്ടുവന്നതായി വിശ്വസിക്കപ്പെടുന്നു.

തേജ്പാൽ സിംഗ്, സഞ്ജിബ് കുമാർ സിംഗ് (2016) എന്നിവർ തമിഴ്‌നാട്ടിലെ സ്വാമിമലൈയിലും തഞ്ചാവൂർ പ്രദേശത്തും വെങ്കല ശില്പങ്ങളുടെ സാങ്കേതികതകളെക്കുറിച്ച് ഒരു നരവംശശാസ്ത്ര ഗവേഷണം നടത്തിയിട്ടുണ്ട്. അവരുടെ പഠനഫലവും മാന്നാർ വെങ്കല വാർപ്പ് രീതികളുമായി താരതമ്യപ്പെടുത്തുമ്പോൾ, വെങ്കല വാർപ്പിന്റെ സാങ്കേതികത തമിഴ്നാട്ടിൽ നിന്നാണ് കേരളത്തിലെത്തിയത് എന്ന ജനകീയ വിശ്വാസത്തെ സ്ഥിരീകരിക്കുന്നു. മാന്നാർ, സ്വാമിമല എന്നിവിടങ്ങളിൽ ശില്പ നിർമാണത്തിനു സമാനമായ രീതികളും സാങ്കേതികതകളുമുണ്ട്. ശില്പങ്ങൾ കാസ്റ്റുചെയ്യുന്നതിന് ഇരുവരും പുരാതന ഗ്രന്ഥമായ ശിൽപശാസ്ത്രം പിന്തുടരുന്നു. ഉപയോഗിക്കുന്ന സാങ്കേതിക പദങ്ങളിൽ ചില വ്യത്യാസങ്ങൾ ഉണ്ടെങ്കിലും, മെഴുക് മാതൃക, കളിമൺ പൂപ്പൽ, ലോഹം ഉരുക്കൽ, ഒഴിക്കൽ, തണുപ്പിക്കൽ, പൂപ്പൽ പൊട്ടിക്കൽ, പകുതി പൂർത്തിയായ വസ്തു പുറത്തെടുക്കൽ, അലങ്കാരം, പൊടിക്കൽ, മിനുക്കൽ എന്നിവ രണ്ടിലും ഒരുപോലെയാണ്.

അജ്ഞാതരായ കേരള വിശ്വകർമജരുടെ അമൂല്യ വെങ്കല ശില്പങ്ങൾ വിദേശ മ്യുസിയങ്ങളിൽ പ്രൗഡിയോടെ നിൽക്കുമ്പോഴും അതിജീവനത്തിനായി ഒരു സമുദായം കൈകാലിട്ട് അടിക്കുന്ന സ്ഥിതി വിശേഷം ആണ് നിലവിൽ ഉള്ളത്.

📝: റെജി ചന്ദ്രൻ