ആദിച്ചനല്ലൂരിൽ നടത്തിയ പുരാവസ്തു ഖനനത്തിൽ 1000 കണക്കിന് വർഷം  പഴക്കമുള്ള ഇരുമ്പ് നങ്കൂരം കണ്ടെത്തി

കേന്ദ്ര പുരാവസ്തു വകുപ്പ് തിരുക്കല്ലൂരിൽ നടത്തിയ ഖനനത്തിൽ വൻതോതിൽ വസ്തുക്കളാണ് കണ്ടെത്തിയത്. ആദിച്ചനല്ലൂരും കടൽ വ്യാപാരവും തമ്മിൽ എന്തെങ്കിലും ബന്ധമുണ്ടോയെന്ന് അന്വേഷണ ഉദ്യോഗസ്ഥർ അന്വേഷിക്കുന്നുണ്ട്. 2020 ലെ  കേന്ദ്ര ബജറ്റ് സമ്മേളനത്തിൽ ആദിച്ചനല്ലൂരിൽ അത്യാധുനിക രീതിയിൽ ഉള്ള മ്യൂസിയം സ്ഥാപിക്കുമെന്ന് കേന്ദ്ര ധനമന്ത്രി നിർമല സീതാരാമൻ പ്രഖ്യാപിച്ചിരുന്നു. ഇതേതുടർന്നാണ് ആദിച്ചനല്ലൂരിൽ കഴിഞ്ഞ വർഷം ആദ്യഘട്ട ഖനനം ആരംഭിച്ചത്. കൊങ്കരായകുറിശ്ശി, ആദിച്ചനല്ലൂർ, തിരുക്കല്ലൂർ, അക്കരം, കരുങ്കുളം എന്നിവിടങ്ങളിലെ അഞ്ചോളം സ്ഥലങ്ങളിൽ ഖനനം നടത്തി. ആദിച്ചനല്ലൂരിൽ ഖനനത്തിൽ ലഭിച്ചവയുടെ കൂടുതൽ വിവരങ്ങളും ഇവിടെ നിന്നിരുന്ന സംസ്കാരത്തിന്റെ ഉറവിടവും കണ്ടെത്തുവാനുള്ള ശ്രമത്തിലാണ് ഗവേഷകർ. മ്യൂസിയം നിർമ്മാണ ജോലികളും ഇതോടൊപ്പം പുരോഗമിക്കുകയാണ്. ഇതിനെ തുടർന്ന് കഴിഞ്ഞ വർഷാവസാനം തിരുക്കല്ലൂരിൽ ആദ്യമായി വാസസ്ഥലങ്ങൾ കണ്ടെത്താനുള്ള ഉത്ഖനന പ്രവർത്തനങ്ങൾ ആരംഭിച്ചു.ഇതിനായി ചരിത്ര ലിഖിതങ്ങളുള്ള ചേര ചോള പാണ്ഡീശ്വര ക്ഷേത്രത്തിന് സമീപം അന്വേഷണവും ഖനനവും ആരംഭിച്ചു. ചരിത്രാതീത കാലം മുതൽ ഇരുമ്പ് യുഗം വരെയുള്ള മൺപാത്രങ്ങൾ വരെ കണ്ടെത്തിയിട്ടുണ്ട്.

ഖനന പ്രദേശം 

20 സെന്റീമീറ്റർ കനമുള്ള അഞ്ച് നിരകളുള്ള മൺ ഇഷ്ടികകൾ കണ്ടെത്തിയതാണ് മറ്റൊരു അത്ഭുതം. 26 സെന്റിമീറ്റർ നീളത്തിലും 18 സെന്റിമീറ്റർ വീതിയിലും 8 സെന്റിമീറ്റർ ഉയരത്തിലും ഈ ഇഷ്ടികകൾ ലഭ്യമാണ്. മറ്റൊരു ഖനന കുഴിക്ക് നാല് നിലകളുണ്ട്. ഒന്നും രണ്ടും നിലകളിൽ മണ്ണ് ചുട്ടു നിർമ്മിച്ച പൈപ്പുകൾ കണ്ടെത്തിയിട്ടുണ്ട്. നാലാം നിലയിൽ മണ്ണുകൊണ്ട് ഉണ്ടാക്കിയ ഒരു അടുപ്പ് കണ്ടെത്തിയിട്ടുണ്ട്.

ചരിത്രാതീതകാലം മുതൽ ഇരുമ്പ് യുഗം വരെയുള്ള ചുവന്ന മൺ പാത്രങ്ങൾ,കറുത്ത ചുവപ്പ് പാത്രങ്ങൾ,തിളങ്ങുന്ന കറുത്ത പാത്രങ്ങൾ,തിളങ്ങുന്ന ചുവന്ന പാത്രങ്ങൾ, തവിട്ട് നിറത്തിൽ ഉള്ള പാത്രങ്ങൾ എന്നിവ ഇവിടെ കാണപ്പെടുന്നു.പല  നിറങ്ങളിലുള്ള ചുട്ടെടുത്ത മൺ പാത്രങ്ങൾ ഇവിടെ നിന്ന് ലഭിച്ചിട്ടുണ്ട്.ഉപരിതലത്തിൽ നിന്ന് 2 മീറ്റർ വരെ ആഴത്തിൽ പൊട്ടിയ വളകളും മറ്റ് ആഭരണവസ്തുക്കൾ എന്ന് തോന്നിക്കുന്ന വസ്തുക്കലും ലഭിക്കുന്നുണ്ട്.

കൂടാതെ ഇരുമ്പ് വസ്തുക്കളും ചെമ്പ്നാണയങ്ങളും,മണ്ണിൽ ചുട്ടെടുത്ത പ്രതിമകളും കണ്ടെത്തിയിട്ടുണ്ട്.കേന്ദ്ര പുരാവസ്തു വകുപ്പിന്റെ നേതൃത്വത്തിൽ തൂത്തുക്കുടി ജില്ലയിലെ ആദിച്ചനല്ലൂരിൽ ലോകോത്തര നിലവാരത്തിലുള്ള മ്യൂസിയം സ്ഥാപിക്കുന്നതിനുള്ള പ്രവർത്തനങ്ങൾ നടന്നുവരുന്നു.പദ്ധതിയുടെ ആദ്യഘട്ടമെന്ന നിലയിൽ ആദിച്ചനല്ലൂരിലെ പറമ്പ് മേഖലയിൽ ഖനനം നടത്തി.

കണ്ടെത്തിയ ഇരുമ്പ് നങ്കൂരം 

ഡോക്യുമെന്റേഷൻ ജോലികൾക്കിടെ രണ്ടടി ഉയരമുള്ള ഇരുമ്പു നങ്കൂരം കണ്ടെത്തിയത് ഗവേഷകരിൽ ആവേശം സൃഷ്ടിച്ചു. അതുകൊണ്ടുതന്നെ ആദിച്ചന്നലൂരും കടൽ വ്യാപാരവും തമ്മിൽ എന്തെങ്കിലും ബന്ധമുണ്ടോ എന്ന് ഗവേഷകർ അന്വേഷിക്കുന്നുണ്ട്.